नयाँ नेपाल निर्माणका लागि जनता जागरुक हुनुपर्छ र नेताहरुमा परिवर्तन आउनैपर्छ।

हामी सबैले नयाँ नेपाल भन्ने मात्र गरेका छौं। तर नयाँ नेपाल निर्माणका लागि हरेक जनमानसमा (नेपाली जनतामा) आफूमा परिवर्तन आउनुपर्छ। तब मात्र नयाँ नेपाल निर्माण सम्भव हुन्छ। अहिलेको नयाँ नेपालको कुरा नयाँ बोतलमा पुरानै रक्सी जस्तो वातावरण रहेको छ। हरेक जनतामा देशभक्तिको भावना र नेताहरुमा देशका लागि केही गर्छु भन्ने सोच आउनपर्यो। पुरानै नेताहरु र उनीहरुको मनस्थिति उही छ भने परिवर्तन सम्भव छैन। ती नेताहरु जसलाई जनताले चुनेको छ। जनताले नयाँ नेपाल निर्माणका लागि आ–आफ्नो ठाउँबाट चुनेर पठाएको छ। तिनीहरुमा परिवर्तन आउनुपर्छ। त्यसपछि तिनीहरुमा आफ्नो व्यक्तिगत फाइदाभन्दा पनि देशको लागि के गर्न सकिन्छ भन्ने देशभक्तिको भावना छ भने मुलुकमा आमूल परिवर्तन गर्न सकिन्छ।
हामी सबै नयाँ नेपाल भनेर सबैजना खुसी भएका थियौं। तर नेपालको दुर्दशा यस्तो छ। हामीकहाँ कहिले बिजुली छैन। यो भन्दा अगाडि पेट्रोलियम पदार्थको अभाव थियो। देशका राम्रा प्रतिभाहरु विदेश पलायन हुने क्रम बढ्दो छ। दिनप्रतिदिन बेरोजगारी बढिरहेको छ। भोलिका दिनमा राम्रा भन्दा नराम्रा कुराहरु हाबी हुँदै जानेहुन् कि जस्तो देखिन्छ। यसले नयाँ नेपालको सपनालाई चकनाचुर बनाएको छ। नयाँ नेपालको सपना देख्नु सपनामात्र हुन्छ। सबैको भावनामा देशका लागि केही गरौं भन्ने भावना हुनुपर्छ। नयाँ नेपाल निर्माणका लागि जनता जागरुक हुनुपर्छ र नेताहरुमा परिवर्तन आउनैपर्छ।
देशमा रहेका सम्पदाहरुको सही सदुपयोग गर्यौं भने हामीले केही न केही परिवर्तनको अनुभूति गर्न सक्छौं। चुहावट, भ्रष्टाचार, घूसखोरी जस्ता कुराहरु रोक्न सक्यौं र हामीसँग रहेका जलस्रोतको समुचित प्रयोग गर्न सक्यौं भने हामीले अवश्य पनि देशलाई परिवर्तनको बाटोमा लैजान सक्छौं।
यसका लागि नेताहरुको दिमागमा देश र जनताका लागि केही गर्नुपर्छ भन्ने सकारात्मक सोच जाग्न जरुरी हुन्छ। यी यावत् कुराहरुमा सही समयमा सही ठाउँमा 'क्लिक' गर्यो भने नयाँ नेपाल निर्माण हुनसक्छ, तर यही सोचाइ आउन नै धैरै समय लाग्नेजस्तो देखिन्छ। यहाँ मानिसहरुको मनस्थिति नै नराम्रो भइसक्यो। अहिले देशमा संघीयताको नारा दिइएको छ, तर वैज्ञानिक संघीयताका कुनै पनि आधारहरु पेश भएको छैन। देश सबैको साझा फूलबारी हो, यो देशका सबै नागरिक समान हुन्। यहाँ कोही तराई, कोही पहाडी वा कोही मधेशी भन्ने हुँदैन। जातीयताका आधारमा विभाजित हुनु गलत कुरा हो। भावनमा म नेपाली हुँ भनेर सबैले सोच्नुपर्छ। एउटा मानिस औसत ६०–७० वर्ष बाँच्छ। जन्म लिएपछि एक दिन मर्नु नै छ भने यस्ता जातीयताका कुरा लिएर किन अराजकता मच्चाउनु? हामी सद्भावपूर्ण रुपमा मिलेर बाँचेका छौं। यो जात, त्यो जात होइन। हामी सबै नेपाली हौं। यहाँ कोही पहाडे र मधेशी छैन। हामी सबैले नेपाली हौं भन्ने भावनामा गर्व गरेर अगाडि बढ्नुपर्छ।
Jai Nepal Jai Matribhumi
Yuva Nepal Sangathan (YNS)
http://yuvanepalsangthan.wordpress.com